“Avroviziya 2023”: ev sahibi dəyişir
“Avroviziya 2023” beynəlxalq mahnı müsabiqəsinin ev sahibi dəyişir. Novator.az-ın məlumatına görə, iyunun 17-də Avropa Yayım Birliyi Rusiyanın hərbi işğalına məruz qaldığı üçün Ukraynada yarışın keçirilməsinin mümkün olmadığını bəyan edib. Yeni ünvan kimi Böyük Britaniya göstərilir.
İctimai teleradioları bir araya gətirən Avropa Yayım Birliyi “Avroviziya” yarışını 1956-cı ildən keçirir. 66 müsabiqədə İrlandiya 7, İsveç 6, Böyük Britaniya, Fransa, Lüksemburq, Niderland 5, İsrail 4, Danimarka, İtaliya, Norveç, Ukrayna 3, Almaniya, Avstriya, İspaniya, İsveçrə 2, Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya, Yunanıstan 1 dəfə qalib olub.
Mayın 10-14-ü İtaliyanın Turin şəhərində keçirilmiş “Avroviziya 2022”də Ukraynanın “Kaluş” qrupu zəfər çalıb, Böyük Britaniya təmsilçisi Sem Rayder ikinci yeri tutub.
“Avroviziya 2023”də iştiraka razılıq vermiş ölkələr bunlardır: Albaniya, Almaniya, Avstriya, Böyük Britaniya, Danimarka, Finlandiya, İspaniya, İsrail, İsveç, İtaliya, Kipr, Monteneqro, Niderland, Norveç, Polşa, San Marino, Serbiya, Ukrayna, Yunanıstan.
