İqtisadçı, REAL Partiyasının funksioneri Natiq Cəfərli Rusiyanın Ukraynaya təcavüzünün dünya siyasi “elitasının” bir qisminə tam sərf etdiyini yazır. Novator.az-ın məlumatına görə, o, iki məsələni əsas gətirir: “Əvvəla, pandemiya yaddan çıxdı, müharibə bu məsələnin üstünü örtdü. 2020-2021-ci illərdə pandemiya fonunda o qədər səhv qərar, mənasız qadağa oldu ki, müharibə başlamasa, dünya həmin “elitanı” məhşər ayağına çəkəcəkdi. İstintaqlar, araşdırmalar, qalmaqallar, hətta səs-küylü həbslər ola bilərdi. İndi isə hamının başı Rusiyanın vəhşiliyinə qarışıb, suallar da, iradlar da, vaksin kampaniyası kimi mənasız addımlar da yaddan çıxıb.

İkincisi, müharibə neft-qaz qiymətlərini kəllə-çarxa çıxardı. Hələ bir müddət də bahalıq olacaq. Sanksiyalara tuş gəlsə də, neft-qaz baha olduğuna görə Rusiya günə 1 milyard dollar pul qazanır, keçən il bu rəqəm 330 milyon dollar idi.

Baha neft-qaz ən çox alternativ enerji lobbisinə lazımdır – qiymətlər yüksək olmasa, heç kim (özəl sektor) alternativ enerjiyə sərmayə qoymaz. Ənənəvi enerji daşıyıcıları mütləq baha olmalıdır ki, alternativ enerji sahəsi subsidiyadan çıxsın, rentabelli olsun. Bu gün neftin barreli, tutalım, 40 dollar, qazın min kubmetri, məsələn, 170-200 dollar olsa, heç bir özəl təşəbbüs alternativ enerji layihələrinə sərmayə yönəltməz, tək dövlət vəsaiti və subsidiyaları ilə isə bu sahəni inkişaf etdirmək mümkün deyil”.

2014-cü ildə Rusiya Ukraynanın Krım yarımadasını zəbt edərək özünə birləşdirib, Donetsk və Luqansk vilayətlərinin bir hissəsini də tutaraq hər iki ərazidə separatçı rejimlər qurub.

2022-ci il fevralın 21-də Rusiya Donetsk və Luqansk vilayətlərində qurulmuş rejimləri müstəqil dövlətlər kimi tanıyıb, fevralın 24-dən isə Ukraynada total hərbi əməliyyatlar aparır.