“Qarabağ”ın ilk rəqibi bilindi
İyunun 14-ü UEFA Çempionlar Liqasının 2022-2023 mövsümündə birinci mərhələnin (5-13 iyul) püşkü atılıb. Novator.az-ın məlumatına görə, Azərbaycan təmsilçisi “Qarabağ”a Polşanın “Lex” komandası qismət olub.
1922-ci ildə yaradılan “Lex” 8 dəfə Polşa çempionu olub, 5 dəfə ölkə kubokunu qazanıb.
İlkin təsnifat mərhələsi 21-24 iyuna təyin edilib.
İkinci mərhələdə (19-27 iyul) Azərbaycan təmsilçisinə “Makkabi” (Hayfa, İsrail), “Sürix” (İsveçrə), üçüncü mərhələdə (2-9 avqust) “Apollon” (Kipr), dördüncü mərhələdə (16-24 avqust) “Kopenhagen” (Danimarka) komandaları rəqib ola bilər.
Turnirin qrup mərhələsi sentyabrın 6-da başlayıb noyabrın 2-də bitəcək.
İlkin, birinci mərhələlərdə ələnən komandalar Konfrans Liqasına, ikinci, üçüncü, dördüncü mərhələlərdə ələnən, qruplarda üçüncü yeri tutan komandalar Avropa Liqasına köç edəcək.
