Gəlir xeyir gətirmir?
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu neft və qaz gəlirləri üzrə rəsmi statistikadan yazıb. Novator.az-ın məlumatına görə, o qeyd edir ki, Dövlət Neft Fondu 2022-ci ilin yanvar-may aylarında neft gəlirlərini 3 milyard 828 milyon dollar göstərib: “Bu, ötən ilin eyni dövrü ilə müqayisədə 2 dəfədən çox artım deməkdir. Eyni dövrdə qaz gəlirləri 8,5 dəfə artıb. Beş ayda Azərbaycanın neft-qaz gəlirləri ümumilikdə 4 milyard 354 milyon 537 min dollar olub. Bu vəsaiti manata çevirib beş aya böləndə hər aya 1,5 milyard manat edir.
Söhbət yalnız Dövlət Neft Fondunun qazancından gedir, neftin bahalaşmasından Dövlət Neft Şirkəti və xarici neft-qaz şirkətləri, eləcə də onların mənfəət nefti artdığına görə ödədikləri vergidən büdcə də əlavə qazanc əldə edir.
Bütün bunların müqabilində əhali daha da kasıblaşır, çünki son zamanlar qiymətlərin sürətli artımı onların xərclərini artırır. Amma hakimiyyət yenə də həmişə olduğu kimi qazancı özü mənimsəyir, xərci isə xalqa yükləyir. Eyni siyasət illərdir ki, davam edir”.
