Hüquqşünas həbs edilib
“Tərtər işi”nin ictimai təhqiqatçılarından olan hüquqşünas, fəal İlham Aslanoğlu Yevlax Rayon Məhkəməsinin 9 iyun hökmü ilə 6 ay müddətinə azadlıqdan məhrum edilib. “Turan”ın məlumatına görə, o, “AzerFreedom” internet televiziyasının efirindən vətəndaş Yeganə Ələkbərovanı təhqir etməkdə təqsirli bilinib. Yeganə Ələkbərovanın məhkəməyə xüsusi ittiham qaydasında üz tutduğu vurğulanır.
2022-ci il yanvarın 28-də vətəndaş Tahir Quliyevin xüsusi ittiham qaydasında şikayətini nəzərə alan Yevlax Rayon Məhkəməsi İlham Aslanoğlunu ağır cinayətdə ittiham etməklə böhtanda təqsirli bilərək 5 ay müddətinə azadlıqdan məhrum etmiş, ancaq şikayət geri götürüldüyü üçün Şəki Apellyasiya Məhkəməsi martın 5-də hüquqşünası azadlığa buraxmışdı.
Böyük Britaniyada yaşayan hüquqşünas Qurban Məmmədovun yaratdığı “AzerFreedom” kanalı “Tərtər işi”nin ictimai təhqiqatı ilə məşhurlaşıb.
2017-ci il mayın 8-də Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti birgə bəyanat yayaraq bildirmişdi ki, Tərtər rayonu istiqamətində bir qrup hərbi qulluqçu və mülki şəxs hərbi sirr təşkil edən məlumatları xarici düşmənə ötürüb, toplanmış materiallar əsasında 3 may 2017-ci ildə Hərbi Prokurorluqda cinayət işi başlanıb, bir qrup hərbi qulluqçu və mülki şəxs həbs edilib.
“Tərtər işi” adı ilə tanınan bu iş üzrə yüzlərlə hərbi qulluqçu ermənilərlə məxfi əməkdaşlıqda şübhəli bilinməklə fiziki təsirlərə və qanunsuz sorğuya məruz qalıb, bir çox şəxs xəsarətlər nəticəsində həlak olub.
2021-ci il dekabrın 16-da Baş Prokurorluq cinayət işlərinin icraatını təzələyib.
