FİFA-dan Ekvador qərarı
İyunun 10-da FİFA-nın İntizam Komitəsi 2022-ci ilin dünya futbol çempionatına vəsiqə almış Ekvador milli komandasından şikayət üzrə qərarını açıqlayıb. Şikayətin əsaslı sayılmadığı bəyan olunub.
Novator.az bildirir ki, Ekvador yığması noyabrın 21-dən dekabrın 18-dək Qətərdə keçiriləcək dünya çempionatına Cənubi Amerikadakı seçmə raunddan bilet alıb. Mayın 5-də FİFA-ya üz tutan Çili Futbol Federasiyası Ekvador millisinin ədalətli oyun prinsiplərini pozduğunu iddia edib. Şikayətdə qeyd olunub ki, Ekvador yığmasının oyunçusu Bayron Kastilyo Kolumbiya vətəndaşıdır və onun doğum tarixi saxtalaşdırılıb. Çili Futbol Federasiyası Bayron Kastilyonun iştirak etdiyi 8 oyunun nəticələrinin ləğvini, Ekvadorun dünya çempionatından kənarlaşdırılmasını istəyib.
FİFA-nın İntizam Komitəsinin iyunun 10-da açıqladığı qərarda şikayət üzrə icraatın dayandırıldığı, başqa sözlə, Ekvadora hər hansı cəza verilmədiyi göstərilir.
Qərardan Apellyasiya Komitəsinə şikayət verilə bilər.
Ekvador dünya çempionatının A qrupunda yer alır. Onun rəqibləri Qətər, Seneqal və Niderland yığmalarıdır.
