Taleh Bağırovla başlayan aclıq böyüyür
İyunun 8-də “Turan” həbs yerlərində aclıq aksiyası ilə bağlı yeni məlumat yayıb.
Qobustan həbsxanasında saxlanan Müsəlman Birliyi Hərəkatının sədri Taleh Bağırov iyunun 3-dən aclıq aksiyası keçirir. O, mayın 20-də tutularaq az müddət Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanmış Müsəlman Birliyi Hərəkatının üzvləri Mail Kərimov və Süleyman Ələkbərovun işgəncəyə məruz qaldığını, bu zaman hətta Allaha küfr edildiyini bildirir, belə əməllərə yol verən şəxslərin cəzalandırılmasını istəyir.
“Turan” bildirir ki, hazırda ayrı-ayrı həbs yerlərində daha 5 məhbus Taleh Bağırovun tələbinə qoşularaq aclıq aksiyası keçirir: Müsəlman Birliyi Hərəkatından Abbas Hüseynov, Cabbar Cabbarov, Seyfəddin Şirvanov, jurnalist Polad Aslanov, 2018-ci ilin Gəncə hadisələrinə görə tutulmuş Firudin Zeynalov.
1984-cü il təvəllüdlü Taleh Bağırov 2011-2012 və 2013-2015-ci illərdə həbsdə olub.
O, 2015-ci ilin noyabrında yenidən tutulub, dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək 20 il müddətinə azadlıqdan məhrum edilib, sonradan həbs yerində qadağan olunmuş əşyaların saxlanması, gəzdirilməsi, daşınması və istifadəsində təqsirli bilinərək daha beş ay müddətinə azadlıqdan məhrumetmə cəzası alıb.
