Gənclər Fondunda yenilik
Gənclər Fondunun Müşahidə Şurası yenilənib. Dövlət başçısı İlham Əliyevin 7 iyun sərəncamı ilə şuraya sədrlik Prezident Administrasiyasının gənclər siyasəti və idman məsələləri şöbəsinin müdirinə həvalə olunub. Üzvlər belə sıralanır: gənclər və idman nazirinin müavini, təhsil nazirinin müavini, mədəniyyət nazirinin müavini, əmək və əhalinin sosial müdafiəsi nazirinin müavini, Gənclər Təşkilatları Milli Şurasının sədri, Azərbaycan Tələbə Gənclər Təşkilatları İttifaqının sədri, Azərbaycan Könüllü Təşkilatları İttifaqının İdarə Heyətinin üzvü, Azərbaycanlı Tələbələr və Məzunlar Platformasının İdarə Heyətinin üzvü.
Gənclər Fonduna Fərid Cəfərov icraçı direktorluq edir.
Publik hüquqi şəxs statuslu Gənclər Fondunun nizamnaməsinə görə, fəaliyyətin əsas məqsədi gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində məqsədli maliyyələşdirməkdən, həmin sahədə konfrans, seminar, festival, olimpiada və digər tədbirlərin təşkilindən, habelə gənclərə maliyyə köməyi nəzərdə tutan layihələri dəstəkləməkdən ibarətdir.
