Cəbhəçi həbsdə qalıb, ittiham ağırlaşıb
AXCP üzvü Razi Alışovun ittihamı ağırlaşdırılıb.
Razi Alışovu mayın 28-də Gəncə Şəhər Baş Polis İdarəsinin əməkdaşları tutub. Mayın 30-da Kəpəz Rayon Məhkəməsi Razi Alışov barəsində 2 aylıq həbs qətimkan tədbiri seçib. Ona 3 ildən 7 ilədək azadlıqdan məhrumetmə cəzası nəzərdə tutan ittiham – narkotik vasitə satmaq ittihamı irəli sürülüb.
Azadliq.info-nun məlumatına görə, iyunun 2-də Gəncə Apellyasiya Məhkəməsi Razi Alışovun həbsindən verilmiş şikayətə baxıb. Prosesdə çıxış edən Razi Alışov polis işgəncəsinə məruz qaldığını vurğulayaraq deyib ki, sol qulağı zərbələrdən kar olub, çiynində, qolunda göyərtilər var.
İttihamı rədd edən cəbhəçi üstündə narkotik vasitə olmadığını deyib.
Fəal barəsində seçilmiş həbs qətimkan tədbiri qüvvədə qalıb. O da məlum olub ki, Razi Alışovun ittihamı ağırlaşdırılıb. İndi cəbhəçi qabaqcadan əlbir olan bir qrup şəxsin satış məqsədilə külli miqdarda narkotik əldə etməsi, daşıması, saxlamasında təqsirli bilinir. Bu ittihama 5 ildən 12 ilədək müddətə azadlıqdan məhrumetmə cəzası düşür.
AXCP sədri Əli Kərimli şərh yayaraq qeyd edib ki, bütün dünya dəyişsə də, Əliyev rejimi işgəncə və sifarişli həbslərdən könüllü imtina etmək fikrində deyil: “Biz xalq olaraq işgəncə qurbanlarına, siyasi məhbuslara hamılıqla dəstək olmağı bacarmalıyıq. Rejimə əməlimizlə başa salmalıyıq ki, artıq işgəncə və həbslər də bu xalqın azadlıq və ədalət arzusunu boğa, rejimi qoruyub ayaqda saxlaya bilməyəcək”.
