Azərbaycan büdcə şəffaflığı reytinqində
Beynəlxalq Büdcə Tərəfdaşlığı 2021-ci il üzrə Açıq Büdcə İndeksi yayıb. Reytinq 100 baldan 0 bala (şəffaf büdcədən qapalı büdcəyə) prinsipi ilə tərtib olunub. Novator.az-ın məlumatına görə, iqtisadçı Samir Əliyev yazır ki, Azərbaycan 120 ölkə arasında 44-cü yerdə qərarlaşıb: “Ölkə 100 mümkün baldan 57 bal toplayıb. İndeksin metodologiyasına əsasən, azı 61 bal alan ölkə ictimai müzakirə üçün büdcə barədə yetərli bilgi açan ölkə sayılır. Bu həddə çatmadığı üçün Azərbaycanda məlumatların açıqlanması səviyyəsinin məhdud qaldığı görünür.
Ümumiyyətlə götürdükdə, büdcə şəffaflığı üzrə göstərici yaxşılaşıb. Məsələn, 2010-cu ilin indeksində Azərbaycan 43 bal, 2017-ci ilin indeksində 34 balla yer almışdı.
Ölkənin indeksdə aşağı bal almasının səbəbi ictimai iştirakçılıqla bağlıdır. Bu göstərici üzrə Azərbaycana 9 bal verilib. Həqiqətən də büdcə müzakirələrində ictimai iştirakçılıq yox səviyyəsindədir. Parlamentdə gedən büdcə müzakirələrində vətəndaş cəmiyyəti təsisatları çox nadir hallarda iştirak edir”.
