Məhkəmə bloqçunu həbsdə saxladı
Mayın 27-də Bakı Apellyasiya Məhkəməsi bloqçu Rəşad Ramazanovun həbsindən verilmiş şikayətə baxıb. Vəkil Elçin Sadıqovun yaydığı məlumata görə, şikayət təmin olunmayıb. O, Rəşad Ramazanovun tutulandan sonra Sabunçu Rayon Polis İdarəsinin 14-cü bölməsində işgəncəyə məruz qaldığını əlavə edib: “Rəşadın hər iki ayağında, başında ağır işgəncə izləri var”.
Novator.az bildirir ki, mayın 20-si Bakıda tutulan bloqçu satış məqsədi ilə qanunsuz olaraq külli miqdarda narkotik vasitə saxlamada təqsirli bilinir. Sabunçu Rayon Məhkəməsi mayın 21-də Rəşad Ramazanov barəsində 4 aylıq həbs qətimkan tədbiri seçib.
Satış məqsədi ilə qanunsuz olaraq külli miqdarda narkotik vasitə saxlama ittihamı 5 ildən 12 ilədək müddətə azadlıqdan məhrumetmə cəzası nəzərdə tutur. Hakimiyyəti kəskin tənqid etməsi ilə tanınan Rəşad Ramazanov eyni ittihamla 9 may 2013-cü ildə tutularaq 9 il müddətinə azadlıqdan məhrum edilmiş, 2019-cu il martın 17-də əfv sərəncamı ilə azadlığa çıxmışdı.
1982-ci ildə doğulan Rəşad Ramazanov Bakı Dövlət Universitetinin coğrafiya fakültəsinin məzunudur.
