Sabiq prezident ev dustağı oldu
Mayın 26-da Moldovanın paytaxtı Kişinyovda ilkin məhkəmə sabiq prezident İqor Dodon barəsində 30 sutka ev dustaqlığı qətimkan tədbiri seçib. Novator.az-ın məlumatına görə, İqor Dodon mayın 24-də tutulmuşdu. Ona passiv korrupsiya, siyasi partiyanın cinayət təşkilatı vasitəsilə maliyyələşdirilməsi, qanunsuz sərvət yığımı və dövlətə xəyanət ittihamları irəli sürülüb.
1975-ci il təvəllüdlü İqor Dodon 2016-2020-ci illərdə prezident olub. Əvvəllər Moldova hökumətində müxtəlif postlar, o cümlədən baş nazirin birinci müavini, iqtisadiyyat və ticarət naziri vəzifələrini tutub, Sosialist Partiyasına sədrlik edib.
Moldova parlament respublikasıdır, hökuməti qanunverici orqanda mandatların yarıdan çoxuna sahib olan partiya qurur. Hazırda Hərəkət və Həmrəylik Partiyası hakim partiyadır. Bu partiyanın təmsilçisi Mayya Sandu 2020-ci ildən prezidentdir.
