Səlim Müslümov evə buraxılıb
Sabiq əmək və əhalinin sosial müdafiəsi naziri Səlim Müslümov Səbail Rayon Məhkəməsinin qərarı ilə həbsdən ev dustaqlığına buraxılıb. Mayın 26-da yayılan xəbərə görə, qərar Səlim Müslümovun səhhətində yaranmış problemlərlə əsaslandırılıb.
Novator.az bildirir ki, 1961-ci il təvəllüdlü Səlim Müslümov 2013-2018-ci illərdə əmək və əhalinin sosial müdafiəsi naziri olub. Əvvəlki illərdə Maliyyə Nazirliyində idarə rəisi, Dövlət Gömrük Komitəsində sədr müavini, Dövlət Sosial Müdafiə Fondunun sədri postlarını tutub.
2021-ci il fevralın 4-də rəsmi məlumat yayan Dövlət Təhlükəsizliyi Xidməti sabiq nazirin cinayət məsuliyyətinə cəlb olunduğunu bəyan edib: “Səlim Müslümovun nazir işlədiyi müddətdə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi səlahiyyətlərinin və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsinə dair faktlar araşdırılıb.
Toplanmış materiallar əsasında başlanan cinayət işi üzrə Səlim Müslümovun dövlətin qanunla qorunan mənafelərinə ağır nəticələrə səbəb olan zərər vurmasına, habelə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsini almasına əsaslı şübhələr müəyyən edilib.
Həmçinin Səlim Müslümovun Dövlət Əmək Müfəttişliyi Xidmətinin yoxlamalarının nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub.
Eyni zamanda daxili nəzarət şöbəsinin ərazi strukturlarında apardığı yoxlamaların nəticələri ilə bağlı onun müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyən edilib.
Səlim Müslümov Cinayət Məcəlləsinin 308.2-ci (vəzifə səlahiyyətlərindən ağır nəticələrə səbəb olan sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə məsuliyyətə cəlb olunub, barəsində məhkəmənin qərarı ilə həbs qətimkan tədbiri seçilib”.
