Prezident İlham Əliyev mayın 26-sı birinci vitse-prezident Mehriban Əliyeva ilə birgə Füzuli, Cəbrayıl və Zəngilan rayonlarına səfər edib. AZƏRTAC-ın məlumatına görə, dövlət başçısı Füzulidə Horadiz-Cəbrayıl-Zəngilan-Ağbənd avtomobil yolunun tikintisi ilə tanış olub, Cəbrayılda Horadiz-Ağbənd dəmir yolu xəttinin Soltanlı stansiyasının və “Azərenerji” ASC-nin “Cəbrayıl” enerji qovşağının təməllərini qoyub.

İlham Əliyevin Zəngilan Beynəlxalq Hava Limanının və Zəngilan məscidinin tikinti işləri ilə tanış olduğu, İşğal və Zəfər muzeyləri kompleksinin təməl mərasiminə qatıldığı bildirilir.

Prezidentə Zəngilan şəhərinin baş planı da təqdim olunub.