3 turnir, 233 komanda
2022-2023 mövsümündə UEFA-nın klub turnirlərinə 233 komanda buraxılır. Novator.az bildirir ki, Çempionlar Liqasında 78, Avropa Liqasında 21, Konfrans Liqasında 134 komanda start götürür.
Çempionlar Liqası
İlkin mərhələyə 4, birinci mərhələyə 29, ikinci mərhələyə 9, üçüncü mərhələyə 8, dördüncü mərhələyə 2, qrup mərhələsinə 26 birbaşa vəsiqə var.
İslandiyadan “Vikinqur”, Estoniyadan “Levadiya”, Andorradan “İnter” ilkin mərhələyə (21-24 iyun) bilet alıb.
Norveçdən “Bode-Qlimt”, İsveçdən “Malmö”, Bolqarıstandan “Ludoqorets”, Rumıniyadan “Kluj”, Azərbaycandan “Qarabağ”, Qazaxıstandan “Tobol”, Macarıstandan “Ferensvaroş”, Belarusdan “Şaxtyor”, Polşadan “Lex”, Sloveniyadan “Maribor”, Slovakiyadan “Slovan”, Litvadan “Jalgiris” (Vilnüs), Lüksemburqdan “Düdelanj”, Bosniyadan “Zrinski”, İrlandiyadan “Şemrok Rovers”, Şimali Makedoniyadan “Şkupi”, Latviyadan RFS, Albaniyadan “Tirana”, Şimali İrlandiyadan “Linfild”, Gürcüstandan “Dinamo” (Batumi), Finlandiyadan HİK, Moldovadan “Şerif”, Maltadan “Hibernians”, Farer adalarından “Klaksvik”, Kosovodan “Balkani”, Cəbəllütariqdən “Linkoln”, Monteneqrodan “Sutyeska”, Uelsdən “Nyu Sents” birinci mərhələdə (5-13 iyul) qərar tutub.
İkinci mərhələdən (19-27 iyul) liqalar yolu ilə Ukraynadan “Dinamo”, Türkiyədən “Fənərbaxça”, Danimarkadan “Midtülland”, Kiprdən AEK, çempionlar yolu ilə Çexiyadan “Viktoriya”, Xorvatiyadan “Dinamo”, İsveçrədən “Sürix”, Yunanıstandan “Olimpiakos”, İsraildən “Makkabi” (Hayfa) başlayır.
Üçüncü mərhələyə (2-9 avqust) liqalar yolu ilə Fransadan “Monako”, Portuqaliyadan “Benfika”, Niderlanddan PSV, Belçikadan “Union”, Avstriyadan “Şturm”, Şotlandiyadan “Reyncers”, çempionlar yolu ilə Kiprdən “Apollon”, Serbiyadan “Srvena Zvezda” buraxılıb.
Dördüncü mərhələyə (16-24 avqust) Türkiyədən “Trabzonspor”, Danimarkadan “Kopenhagen” düşüb.
İngiltərədən “Mançester Siti”, “Liverpul”, “Çelsi”, “Tottenhem”, İspaniyadan “Real”, “Barselona”, “Atletiko”, “Sevilya”, İtaliyadan “Milan”, “İnter”, “Napoli”, “Yuventus”, Almaniyadan “Bavariya”, “Borussiya” (Dortmund), “Bayer”, “Leypsiq”, “Ayntraxt” (Frankfurt), Fransadan PSJ, “Marsel”, Portuqaliyadan “Portu”, “Sportinq”, Niderlanddan “Ayaks”, Belçikadan “Brügge”, Avstriyadan “Zalsburq”, Şotlandiyadan “Seltik”, Ukraynadan “Şaxtyor” rəqibləri qrup mərhələsində (6 sentyabr-2 noyabr) gözləyir.
“Qarabağ”a birinci mərhələdə “Linfild”, “Zrinski”, “Şaxtyor” (Belarus), “Sutyeska”, “Klaksvik”, “Lex”, “Hibernians” (Malta), “Tobol”, “Şkupi”, RFS, “Dinamo” (Batumi), “Tirana”, “Balkani” rəqib ola bilər. Potensial rəqiblər sırasında ilkin təsnifat mərhələsinin iştirakçıları da var: “Vikinqur”, “Levadiya”, “İnter” (Andorra).
İkinci mərhələdə Azərbaycan təmsilçisinə “Makkabi” (Hayfa), “Sürix”in, üçüncü mərhələdə “Apollon”un, dördüncü mərhələdə “Kopenhagen”in qismət olması mümkündür.
İlkin, birinci mərhələlərdə ələnən komandalar Konfrans Liqasına, ikinci, üçüncü, dördüncü mərhələlərdə ələnən, qruplarda üçüncü yeri tutan komandalar Avropa Liqasına köç edəcək.
Final matçı 2023-cü il iyunun 10-u İstanbulda keçiriləcək.
Avropa Liqası
Birinci mərhələyə (4-11 avqust) 2, ikinci mərhələyə (18-25 avqust) 7, qrup mərhələsinə (8 sentyabr-3 noyabr) 12 birbaşa bilet ayrılıb.
Birinci və ikinci mərhələlərdə ələnən, qruplarda üçüncü yeri tutan komandalar Konfrans Liqasına keçəcək.
Azərbaycanın təmsil olunmadığı bu turnir 2023-cü il mayın 31-də final oyunu (Budapeşt) ilə başa çatacaq.
Konfrans Liqası
Birinci mərhələ 7-14 iyula, ikinci mərhələ 21-28 iyula, üçüncü mərhələ 4-11 avqusta, dördüncü mərhələ 18-25 avqusta, qrup mərhələsi 8 sentyabr-3 noyabra təyin olunub. Həm birinci, həm ikinci mərhələyə 60, üçüncü mərhələyə 9, dördüncü mərhələyə 5 birbaşa vəsiqə var.
Final 2023-cü il iyunun 7-nə (Praqa) təyin olunub.
Azərbaycanı Konfrans Liqasında “Neftçi”, “Zirə” və “Qəbələ” komandaları təmsil edəcək. Onlar turnirə ikinci mərhələdən qoşulur. Güclülər səbətində yer alan “Neftçi”yə həmin raundda Kiprdən “Aris”, İsveçdən AİK, “Yurqorden”, İsraildən “Makkabi” (Netanya), Bolqarıstandan “Levski”, Rumıniyadan “Sepsi”, Macarıstandan “Kişvarda”, “Puşkaş Akademiya”, Polşadan “Rakov”, Qazaxıstandan “Qızıljar”, Sloveniyadan “Koper”, Belarusdan “Qomel”, Bosniyadan “Velej”, Latviyadan “Valmeyras”, İrlandiyadan “Sent-Patriks Atletik”, Şimali Makedoniyadan “Makedoniya” rəqib ola bilər.
Zəiflər səbətinə salınmış “Zirə” və “Qəbələ”nin mümkün rəqibləri sırasında İsveçrədən “Bazel”, “Yanq Boyz”, Çexiyadan “Slaviya”, “Sparta”, Yunanıstandan PAOK, “Aris”, Türkiyədən “Başakşəhər”, İsraildən “Makkabi” (Tel-Əviv), “Hapoel” (Beer-Şeva), Qazaxıstandan “Astana”, “Kayrat”, Norveçdən “Molde”, Kiprdən APOEL, Rumıniyadan “Styaua”, Belarusdan BATE, Belçikadan “Antverpen”, Macarıstandan “Fehervar”, Portuqaliyadan “Gimarayeş”, Bolqarıstandan SSKA, Litvadan “Suduva”, Slovakiyadan “Spartak”, Xorvatiyadan “Osiyek”, Şotlandiyadan “Motervell”, Serbiyadan “Çukariçki”, Lixtenşteyndən “Vaduts”, Ukraynadan “Vorskla” var.
