Yeni mərkəzin statusu
Mayın 19-da prezident İlham Əliyev publik hüquqi şəxs statuslu Hüquqi Ekspertiza və Qanunvericilik Təşəbbüsləri Mərkəzinin yaradılmasına fərman verib. Sənədə görə, Azərbaycan Milli Elmlər Akademiyasının strukturuna daxil olan Hüquq və İnsan Haqları İnstitutu Hüquqi Ekspertiza və Qanunvericilik Təşəbbüsləri Mərkəzinin tabeliyində publik hüquqi şəxsə çevrilməklə yenidən təşkil ediləcək.
Hüquqi Ekspertiza və Qanunvericilik Təşəbbüsləri Mərkəzinin normayaratma fəaliyyətinin keyfiyyətinin yüksəldilməsi, dövlət orqanları (qurumları) əməkdaşlarının hüquq normalarının tətbiqi sahəsində bilik, bacarıq və səriştələrinin inkişaf etdirilməsi, hüquqi maarifləndirmə, hüquqi ekspertizasının keçirilməsi və hüquqi tənzimləmənin təsirinin qiymətləndirilməsi, habelə qabaqcıl beynəlxalq təcrübə nəzərə alınmaqla hüquqi islahatların həyata keçirilməsinə dair təkliflər hazırlanması və bunlarla bağlı işlərin səmərəli əlaqələndirilməsi sahəsində fəaliyyət göstərəcəyi bəyan olunub.
Qurumun fəaliyyətinə ümumi rəhbərlik və nəzarət üçün sədr də daxil olmaqla 5 üzvdən ibarət Müşahidə Şurası yaradılacaq, mərkəzin fəaliyyətinə cari rəhbərliyi Müşahidə Şurasının vəzifəyə təyin etdiyi icraçı direktor həyata keçirəcək.
Mayın 19-da sərəncam imzalayan dövlət başçısı Şahin Məhərrəm oğlu Əliyevi Ədliyyə Nazirliyinin Ədliyyə Akademiyasının rektoru təyin edib.
Şahin Əliyev Prezident Administrasiyasının hüquq ekspertizası şöbəsinin müdiri idi. APA həmin şöbənin ləğv olunduğunu xəbər verir.
