Keçmiş baş nazirin qatillərindən biri azadlığa buraxılıb
Hindistanın keçmiş baş naziri Raciv Qandinin qətlində təqsirli bilinən şəxslərdən biri – Perarivalan 31 illik həbsdən sonra azadlığa çıxıb.
Novator.az-ın məlumatına görə, onun azadlığa buraxılması haqda qərarı ölkənin Ali Məhkəməsi mayın 18-də qəbul edib.
Məhkəmə öz qərarını Perarivalanın uzun müddətli məhkumluq dövründə sərgilədiyi davranışı, həbsxanada təhsil alması və səhhətində yaranmış problemlər ilə əsaslandırıb.
Raciv Qandi 1984-1989-cu illərdə Hindistan hökumətinə rəhbərlik edib. O, Hindistan Milli Konqres Partiyası seçkidə uduzduqdan sonra postundan gedib.
Sabiq baş nazir 1991-ci ilin mayında Hindistanın Çennai şəhəri yaxınlığında öldürülüb.
Ümumilikdə Qandinin qətlinə görə onlarla sui-qəsdçi məhkum olunub.
2014-cü ildə Hindistan Ali Məhkəməsi qətlin təşkilində təqsirli bilinərək 1998-ci ildə ölüm hökmünə məhkum edilmiş üç məhbusun cəzasını ömürlük həbslə əvəzləyib. Həmin məhbuslardan biri də Perarivalan olub.
Perarivalan və digər sui-qəsdçilər Tamil separatçılarıdır.
Perarivalan 1991-ci ildə, Qandinin qətlindən bir neçə həftə sonra tutulub. Həmin vaxt onun 19 yaşı olub.
İndi Perarivalan 50 yaşdadır.
Mənbə: CNN.com
