Azərbaycana rəsmi səfər edən Litva prezidenti Gitanas Nauseda mayın 18-i Bakıda rəsmən qarşılanıb. AZƏRTAC xəbər verir ki, mərasimdən sonra ali qonaq dövlət başçısı İlham Əliyevlə görüşüb. Prezidentlər geniş tərkibdə də bir araya gəlib, bunun ardınca mətbuata bəyanatlarla çıxış ediblər.

Həmin gün Heydər Əliyev Mərkəzində Azərbaycan-Litva biznes forumu keçirilib. İlham Əliyev və Gitanas Nauseda biznes forumunda iştirak edib nitq söyləyiblər.

Gitanas Nausedanın səfəri mayın 17-də başlayıb.

Forumun yekununda Azərbaycan-Litva sənədləri imzalanıb:

– “Beynəlxalq yol nəqliyyatı sazişi”;

– “Azərbaycan Respublikasının Ticarət və Sənaye Palatası ilə Litva Respublikasının Ticarət, Sənaye və Sənətkarlıq Palataları Assosiasiyası arasında əməkdaşlıq sazişi”;

– “Azərbaycan Respublikasının Kiçik və Orta Biznesin İnkişafı Agentliyi ilə Litva Respublikasının Ticarət, Sənaye və Sənətkarlıq Palataları Assosiasiyası arasında əməkdaşlıq memorandumu”;

– “Azərbaycan Respublikasının İxracın və İnvestisiyaların Təşviqi Agentliyi ilə Litva İnnovasiya Agentliyi arasında əməkdaşlıq memorandumu”;

– “Azərbaycan Respublikasının İxracın və İnvestisiyaların Təşviqi Agentliyi ilə Litva Respublikası Sənayeçilər Konfederasiyası arasında əməkdaşlıq memorandumu”;

– “Azərbaycan Respublikası Sahibkarlar (İşəgötürənlər) Təşkilatları Milli Konfederasiyası ilə Litva Respublikası Sənayeçilər Konfederasiyası arasında əməkdaşlıq müqaviləsi”.