“Avroviziya 2023”ə girişənlər var
Mayın 10-14-ü İtaliyanın Turin şəhərində keçirilmiş “Avroviziya 2022” beynəlxalq mahnı müsabiqəsində Ukraynanın “Kaluş” qrupu qalib oldu. Qaydalara görə, növbəti yarışa – “Avroviziya 2023”ə Ukrayna ev sahibliyi etməlidir. Ancaq Ukrayna 2022-ci il fevralın 24-dən Rusiyanın total hərbi işğalına məruz qaldığı üçün 2023-cü il yarışının başqa ölkədə keçirilməsi mümkündür.
Novator.az bildirir ki, Ukraynanın ev sahibliyi baş tutmasa, bu ölkələr yarışı keçirməyə istəklidir: Böyük Britaniya, İspaniya, İsveç, İtaliya, Niderland, Polşa.
“Avroviziya 2023“də iştiraka ilkin razılıq vermiş ölkələr də var: Avstriya, Finlandiya, İspaniya, İsrail, Kipr, Niderland, Polşa, San Marino.
İctimai teleradioları bir araya gətirən Avropa Yayım Birliyi “Avroviziya” yarışını 1956-cı ildən keçirir. Ümumilikdə 66 müsabiqədə İrlandiya 7, İsveç 6, Böyük Britaniya, Fransa, Lüksemburq, Niderland 5, İsrail 4, Danimarka, İtaliya, Norveç, Ukrayna 3, Almaniya, Avstriya, İspaniya, İsveçrə 2, Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya, Yunanıstan 1 dəfə qalib olub.
Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü, 2019-cu ildə Çingiz Mustafayev 8-ci, 2021-ci ildə Samirə Əfəndi 20-ci, 2022-ci ildə Nadir Rüstəmli 16-cı yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
