Maddi təzminat tələbi qüvvədə qalır
Respublikaçı Alternativ Partiyasının sədri İlqar Məmmədov həbs müddətində vurulmuş ziyana görə maddi təzminat tələb edir.
Novator.az bildirir ki, İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
2018-ci il avqustun 13-də İlqar Məmmədov azadlığa buraxılıb və onun cəzasının qalan hissəsinin şərti sayılmasına qərar verilib.
2019-cu il martın 28-də İlqar Məmmədov haqqında çıxarılmış 7 il azadlıqdan məhrumetmə cəzası 5 il 6 ay 9 günə endirilib, nəticədə İlqar Məmmədovun üzərindəki şərti həbs cəzasına son qoyulub.
2020-ci il aprelin 23-də Ali Məhkəmənin Plenumu İlqar Məmmədova bəraət verib. Həmin qərar əsasında dövlət İlqar Məmmədova 234 min manat mənəvi təzminat ödəyib.
İlqar Məmmədov dövlətdən maddi təzminat da istəyir. Siyasətçi 2021-ci ildə Nəsimi Rayon Məhkəməsinə üz tutaraq 53 min 757 manat maddi təzminat tələbi irəli sürüb. 2022-ci ilin fevralında Nəsimi Rayon Məhkəməsi tələbi rədd edib. Mayın 12-də Bakı Apellyasiya Məhkəməsi aşağı instansiya məhkəməsinin qərarını qüvvədə saxlayıb.
İlqar Məmmədov geri çəkilməyəcəyini, Ali Məhkəməyə şikayət verəcəyini bəyan edib.
