“Avroviziya”nın finalçıları
İtaliyanın Turin şəhərinin ev sahibliyi etdiyi “Avroviziya 2022” beynəlxalq mahnı müsabiqəsinin bütün finalçıları bəlli olub. Novator.az-ın məlumatına görə, 12 may yarımfinalında bu ifaçılar uğur qazanıb: Belçika – Jeremi Makiz, Çexiya – “We Are Domi” qrupu, Azərbaycan – Nadir Rüstəmli, Polşa – Kristian Oçman, Finlandiya – “The Rasmus” qrupu, Estoniya – Stefan Ayrapetyan, Avstraliya – Şeldon Rayli, İsveç – Korneliya Yakobs, Rumıniya – Andrey İonuts Ursu, Serbiya – Ana Curiç.
10 may yarımfinalını bu təmsilçilər dəf etmişdi: İsveçrə – Marius Bea, Ermənistan – Roza Kostandyan, İslandiya – Siqridur, Elizabet, Elin bacıları, Litva – Monika Lübinayte, Portuqaliya – Mariana Sekka, Norveç – “Subwoolfer” qrupu, Yunanıstan – Amanda Tenford, Ukrayna – “Kaluş” qrupu, Moldova – “Zdob şi Zdub” və “Advahov qardaşları” qrupları, Niderland – Stin den Hollander.
Mayın 14-nə təyin olunan finala bu təmsilçilər birbaşa buraxılıb: Almaniya – Malik Harris, Böyük Britaniya – Sem Rayder, Fransa – Aleksis Morvan-Rozius və “Ahez” qrupu, İspaniya – Şanel Terrero, İtaliya – Alessandro Mahmud və Rikkardo Fabbrikoni.
İctimai teleradioları bir araya gətirən Avropa Yayım Birliyi “Avroviziya” yarışını 1956-cı ildən keçirir. Müsabiqədə İrlandiya 7, İsveç 6, Böyük Britaniya, Fransa, Lüksemburq, Niderland 5, İsrail 4, Danimarka, İtaliya, Norveç 3, Almaniya, Avstriya, İspaniya, İsveçrə, Ukrayna 2, Azərbaycan, Belçika, Estoniya, Finlandiya, Latviya, Monako, Portuqaliya, Rusiya, Serbiya, Türkiyə, Yuqoslaviya, Yunanıstan 1 dəfə qalib olub.
Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü, 2019-cu ildə Çingiz Mustafayev 8-ci, 2021-ci ildə Samirə Əfəndi 20-ci yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
