“Xarıbülbül” festivalı başlayıb
Mayın 12-si Şuşa şəhərində, Cıdır düzündə “Xarıbülbül” beynəlxalq folklor festivalı start götürüb. AZƏRTAC xəbər verir ki, açılış mərasimində prezident İlham Əliyevlə birinci vitse-prezident Mehriban Əliyeva da iştirak ediblər.
Arayışa görə, festival Heydər Əliyev Fondu, Mədəniyyət Nazirliyi və Şuşa Şəhəri Dövlət Qoruğunun birgə təşkilatçılığı ilə keçirilir. Mayın 14-də başa çatacaq festivala xarici ölkələrdən musiqiçilər, rəqs kollektivləri, həmçinin Azərbaycanın folklor kollektivləri qatılıb.
Şuşa şəhərində ilk “Xarıbülbül” festivalı 1989-cu ildə keçirilib.
1990 və 1991-ci illərdə “Xarıbülbül” festivalı beynəlxalq statusla təşkil edilib.
1992-2020-ci illərdə Şuşa erməni işğalında olub.
2021-ci il mayın 12-13-də Heydər Əliyev Fondunun təşkilatçılığı ilə dördüncü festival baş tutub.
Əsası 1750-ci ildə qoyulan Şuşa Qarabağ xanlığının paytaxtı, Qarabağ əyalətinin, Şuşa qəzasının baş şəhəri, Yuxarı Qarabağda rayon mərkəzi olub.
1992-ci il mayın 8-nə keçən gecə Şuşaya hücum edən erməni birləşmələri mayın 9-da şəhəri ələ keçirib.
2020-ci il noyabrın 8-də Azərbaycan hərbçiləri Şuşanı düşməndən təmizləyib.
2021-ci il mayın 7-də Şuşa şəhəri Azərbaycanın mədəniyyət paytaxtı elan edilib.
Şuşa rayonu Şuşa şəhərindən, 1 qəsəbə və 37 kənddən ibarətdir. Hazırda Şuşanın Daşaltı kəndi də Azərbaycanın nəzarətindədir. 36 kənd, eləcə də Turşsu qəsəbəsi işğalda və bölgədə atəşkəsə məsul olan Rusiya sülhməramlılarının əlindədir.
