Hasilat hesabatı, yeni qiymət
Energetika Nazirliyinin hesabatına görə, 2022-ci ilin yanvar-aprel aylarında Azərbaycanda kondensatla birlikdə 11,1 milyon ton neft çıxarılıb, hasilat ötən ilin eyni dövrü ilə müqayisədə 409 min ton azalıb.
Dörd ayın kondensatla birlikdə ixracı 9 milyon ton göstərilir, 2021-ci ilin yanvar-aprel aylarına nəzərən 501 min ton (5,3 faiz) azalma qeydə alındığı bildirilir.
Rəsmi məlumata əsasən, mayın 12-də “AzəriLayt” markalı Azərbaycan neftinin barreli 112,73 dollara satılır.
2022-ci ilin dövlət büdcəsində bir barrel neftin qiyməti 50 dollardan götürülüb. “AzəriLayt” yanvara 82,49, fevrala 94,20, marta 102,30, aprelə 112,33, maya 110,70 dollarla başlayıb.
Gündəlik xam neft hasilatı yanvarda 580,9 min barrel, fevralda 566,3 min barrel, martda 579,4 min barrel olub.
İri neft ixracatçılarını birləşdirən OPEK+ koalisiyası may üçün gündəlik hasilatı 688 min barrel, iyun üçün 695 min barrel müəyyən edib.
Novator.az bildirir ki, son illərin hasilat göstəriciləri belə rəsmiləşib: 2008-ci il – 44,5 milyon ton, 2009-cu il – 50,4 milyon ton, 2010-cu il – 50,8 milyon ton, 2011-ci il – 45,6 milyon ton, 2012-ci il – 43,4 milyon ton, 2013-cü il – 43,5 milyon ton, 2014-cü il – 42 milyon ton, 2015-ci il – 41,6 milyon ton, 2016-cı il – 41 milyon ton, 2017-ci il – 38,7 milyon ton, 2018-ci il – 38,8 milyon ton, 2019-cu il – 37,4 milyon ton, 2020-ci il – 34,5 milyon ton, 2021-ci il – 34,6 milyon ton.
