İqtisadi mövzulu təlimlər
İqtisadi Təşəbbüslərə Yardım İctimai Birliyi gənc jurnalistlər, bloqçular və ictimai fəalların dövlət maliyyəsinin idarə edilməsində şəffaflıq, hesabatlılıq sahəsində bilik və bacarıqlarını artırmaq, dövlət vəsaitlərinin istifadəsi üzrə araşdırma qabiliyyətlərini inkişaf etdirmək məqsədilə təlimlər təşkil edir.
Təlimlərin birinci mərhələsində iştirakçılara dövlət maliyyə sisteminin tərkibi və strukturu, büdcə sistemi və büdcə prosesləri, büdcə prosesinin iştirakçıları və maraqlı tərəfləri, nəticəyə yönələn büdcə proseslərinin təşkili xüsusiyyətləri, habelə büdcə təsnifatı izah ediləcək, büdcə məlumatları ilə işləmə qabiliyyətləri aşılanacaq.
Növbəti mərhələdə iştirakçılara büdcə proseslərində şəffaflıq və hesabatlılıq sahəsində milli və beynəlxalq tələblər, büdcə proseslərində maraq qruplarının iştirak formaları, dövlət büdcəsinə kənar nəzarətin təşkili xüsusiyyətləri və dövlət satınalmalarında şəffaflıq məsələləri izah ediləcək.
Son mərhələdə jurnalist araşdırmalarının təşkili üsulları tədris olunacaq.
Həftə sonları keçiriləcək təlimlərin hər mərhələsinin dörd gün çəkməsi nəzərdə tutulur.
Son mərhələnin iştirakçıları ilk mərhələləri uğurla başa vuranlar arasından seçiləcək.
Təlimlərdə iştirak etmək istəyənlər bioqrafik məlumatı və qısa niyyət məktubunu [email protected] ünvanına göndərməlidir.
Son müraciət tarixi 25 may 2022-ci ildir.
İqtisadi Təşəbbüslərə Yardım İctimai Birliyini iqtisadçılar Azər Mehtiyev, Rövşən Ağayev, Samir Əliyev və başqa ekspertlər yaradıb.
