Ziyarət, səfər
Prezident İlham Əliyev, birinci vitse-prezident Mehriban Əliyeva və ailə üzvləri mayın 10-u Bakının Fəxri xiyabanında mərhum dövlət başçısı Heydər Əliyevin məzarını ziyarət ediblər.
Mayın 10-u Heydər Əliyevin doğum günüdür.
1923-cü il təvəllüdlü Heydər Əliyev tarix və dövlət təhlükəsizliyi üzrə iki ali təhsil alıb.
1941-ci ildən Naxçıvan Xalq Daxili İşlər Komissarlığında və Xalq Komissarları Sovetində çalışıb. 1944-cü ildə dövlət təhlükəsizliyi orqanlarına keçən Heydər Əliyev 1965-ci ildən Azərbaycan Dövlət Təhlükəsizliyi Komitəsi sədrinin müavini, 1967-ci ildən sədri vəzifəsini tutub.
1969-cu il iyulun 14-dən Heydər Əliyev Azərbaycan Kommunist Partiyası Mərkəzi Komitəsinin birinci katibi – respublika rəhbəri, 1982-1987-ci illərdə Sovet İttifaqı Kommunist Partiyası Mərkəzi Komitəsi Siyasi Bürosunun üzvü, SSRİ Nazirlər Soveti sədrinin birinci müavini olub.
1990-cı ildə Heydər Əliyev Azərbaycan parlamentinin və Naxçıvan Ali Sovetinin deputatı seçilib, 1991-1993-cü illərdə Naxçıvan Muxtar Respublikası Ali Məclisinin sədri postunu tutub.
1992-ci ildə Yeni Azərbaycan Partiyasının sədri seçilib.
Heydər Əliyev 1993-cü il iyunun 15-də Azərbaycan Ali Sovetinin sədri seçilib, iyunun 24-də Milli Məclisin qərarı ilə prezident səlahiyyətlərini həyata keçirməyə başlayıb.
1993-cü və 1998-ci illərdə Azərbaycan prezidenti seçilib.
2003-cü il dekabrın 12-də vəfat edib.
AZƏRTAC xəbər verir ki, ziyarətin ardınca İlham Əliyev və Mehriban Əliyeva Füzuli rayonuna baş çəkiblər. Onlar Füzuli şəhərində peşə liseyinin, rayon mərkəzi xəstəxanasının təməllərini qoyub, yeni yaradılacaq mərkəzi parkın ərazisində ağac əkiblər.
