Nöqtə ərəfəsi
UEFA-nın klub turnirlərində 2021-2022 mövsümü başa çatır: Çempionlar Liqasında final 28 maya (Paris, “Liverpul” – “Real”), Avropa Liqasında final 18 maya (Sevilya, “Ayntraxt” (Frankfurt) – “Reyncers”), Konfrans Liqasında final 25 maya (Tirana, “Roma” – “Feyenoord”) təyin olunub.
Novator.az bildirir ki, Çempionlar Liqası finalçılarının hər ikisi titul sahibidir. 1955-ci ildən keçirilən, 1992-ci ilə qədər Çempionlar kuboku adı daşımış turniri “Real” 13, “Liverpul” 6 dəfə zirvədə tamamlayıb.
Avropa Liqasında bir finalçının titulu var. 1971-ci ildən keçirilən, 2009-cu ilədək UEFA kuboku adlanmış turnirdə “Ayntraxt” (Frankfurt) 1 uğur qazanıb.
Konfrans Liqası bu mövsümdən keçirilir.
UEFA-nın klub reytinqinə İngiltərə başçılıq edir.
Reytinq turnirlərdə son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
