İkinci müddət başlayır
Yenidən Fransa prezidenti postuna mandat almış Emmanuel Makronun andiçmə mərasimi mayın 7-nə təyin olunub.
Novator.az bildirir ki, 1977-ci il təvəllüdlü Emmanuel Makron əsası 2016-cı ildə qoyulmuş İntibah Partiyasının lideridir. 2017-ci il mayın 7-də prezident seçkisini udan Emmanuel Makron həmin il mayın 14-dən dövlət başçısıdır.
2022-ci il aprelin 24-də Emmanuel Makron yenidən prezident seçkisinin qalibi olub.
Fransanı daha bir seçki gözləyir. İyunun 12-nə parlamentin aşağı palatasına – Milli Məclisə seçkinin ilk turu təyin edilib. İkinci tur günü də bəllidir: 19 iyun.
Milli Məclis 577 təkmandatlı dairədə seçilir.
2017-ci il iyunun 11-18-də seçilmiş indiki parlamentdə Emmanuel Makronun partiyası və ona dəstək verən Demokratik Hərəkat Partiyası çoxluqdadır.
