Çində həbsdə olan jurnalistlərin 44 faizi uyğurdur
Çində həbsdə olan jurnalistlərin 44 faizi uyğurdur. Novator.az-ın məlumatına görə, mərkəzi ofisi Nyu-York şəhərində yerləşən Jurnalistləri Müdafiə Komitəsinin hesabatında belə deyilir.
Hesabat 2021-ci ilin sonuna olan vəziyyəti əks etdirir. Həmin dövrdə dünyada 293 jurnalistin həbsdə olduğu qeydə alınıb. Onlardan 50-si Çin jurnalistidir.
Çində məhbəs həyatı yaşayan jurnalistlərin 44 faizi isə milliyyətcə uyğurdur və ölkənin bir bölgəsindən – Sincan Uyğur Muxtar Rayonundandır.
Jurnalistləri Müdafiə Komitəsinin hesabatı 2022-ci ilin mayında ABŞ Nümayəndələr Palatasının bir qrup üzvünün hazırladığı, dünyada jurnalistlərə qarşı repressiyaların pisləndiyi qətnaməyə salınıb.
Mərkəzi ofisi Vaşinqtonda yerləşən İnsan Hüquqları üzrə Uyğur Layihəsi (Uyghur Human Rights Project – UHRP) vurğulayıb ki, Çindəki kommunist rejimi illərdir uyğur jurnalistləri təqib edir.
Uyğurlar əsasən Çinin şimal-qərbində yerləşən Sincan Uyğur Muxtar Rayonunda yaşayırlar. Burada milyon yarımdan çox uyğur əsir düşərgələrində saxlanır.
Beynəlxalq qurumların hesabatlarına əsasən, Çində milyonlarla uyğur məcburi əməyə, işgəncəyə və cinsi zorakılığa məruz qalır, hökumət uyğurların kökünü kəsmək üçün qadınların uşaq dünyaya gətirməsinə də maneələr törədir.
Dünyanın bir sıra demokratik dövlətləri, o cümlədən ABŞ uyğurlara qarşı hərəkətləri soyqırımına cəhd kimi qiymətləndirir.
Mənbə: Voanews.com
