“Qarabağ” doqquzuncu qızıla yetişdi
Mayın 3-ü Azərbaycanın milli futbol çempionatında 2021-2022 mövsümünün qalibi müəyyənləşib. Novator.az bildirir ki, xal sayını 59-a çatdıran “Qarabağ” (Ağdam) əlçatmaz olaraq çempionluğu təmin edib. Bu, komandanın 9-cu zəfəridir.
1992-ci ildən keçirilən milli çempionatlarda daha 7 komanda qızıla sahib çıxıb: “Neftçi” 9, “Kəpəz” (Gəncə) 3, “Şəmkir”, “Bakı” və “İnter” (indiki “Şamaxı”) 2, “Turan” (Tovuz) və “Xəzər Lənkəran” 1 dəfə çempion olub.
2001-2002 mövsümü yarımçıq qalıb, 2002-2003 mövsümündə çempionat keçirilməyib.
Əsası 1951-ci ildə Ağdam şəhərində qoyulan “Qarabağ” komandası 1977-ci ilədək “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in çempionu olub, 6 dəfə Azərbaycan kubokunu qazanıb, 1 dəfə Çempionlar Liqasının qrup mərhələsində, 6 dəfə Avropa Liqasının qrup mərhələsində, 1 dəfə Konfrans Liqasının qrup mərhələsində oynayıb.
