Seçimsiz yığıncaq
Azərbaycan Milli Elmlər Akademiyasında (AMEA) prezident seçkisi yubanır.
Əsası 1945-ci ildə qoyulan AMEA-nın ali idarəetmə orqanı ümumi yığıncaqdır. Nizamnamə illik ümumi yığıncağın hər il aprel ayında keçirilməsini hökm edir.
Novator.az bildirir ki, 27 aprel 2022-ci il iclasında 2021-ci ildəki elmi və elmi-təşkilati fəaliyyətlə bağlı hesabatlar dinlənib, seçim olmayıb.
Həqiqi üzvlərdən ibarət ümumi yığıncağın AMEA prezidentini seçmək hüququ var. Gizli səsvermədə 5 il müddətinə seçilən AMEA prezidenti Azərbaycan prezidentinin sərəncamı ilə təsdiqlənir.
2019-cu il oktyabrın 23-dən AMEA prezidenti olan Ramiz Mehdiyev 2022-ci il fevralın 14-də istefa verib. Fevralın 19-da ümumi yığıncaq Ramiz Mehdiyevin istefasını qəbul edib, prezident səlahiyyətləri Fizika İnstitutunun baş direktoru, birinci vitse-prezident vəzifəsinin icraçısı Arif Həşimova keçib.
1949-cu il təvəllüdlü Arif Həşimov texnika elmləri doktoru, əməkdar elm xadimidir. 2007-ci ildən AMEA-nın həqiqi üzvüdür.
AMEA-nın prezidenti postunu Ramiz Mehdiyevə qədər bu şəxslər tutub: Mir Əsədulla Mirqasımov, Musa Əliyev, Yusif Məmmədəliyev, Zahid Xəlilov, Rüstəm İsmayılov, Həsən Abdullayev, Eldar Salayev, Fəraməz Maqsudov, Mahmud Kərimov, Akif Əlizadə.
