Nazirliyin strukturunda yeniliklər
Aprelin 27-də prezident İlham Əliyev Ekologiya və Təbii Sərvətlər Nazirliyində yeniliklərə fərman verib. Sənədə görə, “Geodeziya və Kartoqrafiya” Məhdud Məsuliyyətli Cəmiyyəti publik hüquqi şəxs statuslu Geodeziya və Kartoqrafiya Agentliyinə çevrilir, Milli Geoloji Kəşfiyyat Xidmətinin əsasında Geoloji Kəşfiyyat Agentliyi publik hüquqi şəxs yaradılır.
Geodeziya və Kartoqrafiya Agentliyi geodeziya (xüsusi (sahəvi) təyinatlı geodeziya istisna olmaqla) dövlət topoqrafik xəritələrinin və planlarının hazırlanması, ümumdövlət əhəmiyyətli məsələlərin həllini təmin edən dövlət planlarının tərtibi, qravimetriya, kartoqrafiya və xəritəçəkmə, dövlət əhəmiyyətli coğrafi məlumat sistemlərinin yaradılması, geodeziya (xüsusi (sahəvi) təyinatlı geodeziya istisna olmaqla) və kartoqrafiya fəaliyyətinə nəzarətin həyata keçirilməsi sahəsində; Geoloji Kəşfiyyat Agentliyi kompleks geoloji, geofiziki, hidrogeoloji, mühəndis-geoloji, geoekoloji tədqiqatların aparılması, yeraltı suların, faydalı qazıntı yataqlarının axtarışı, qiymətləndirilməsi və kəşfiyyatı, yer təkinin dərinlik quruluşunun və seysmohidrogeodinamik şəraitinin öyrənilməsi, sənaye və mülki tikinti obyektlərinin ərazisində mühəndis-geoloji işlərinin həyata keçirilməsi sahəsində fəaliyyət göstərir.
