Ermənistan hökumətində təyinat
Ermənistan prezidenti Vaahn Xaçaturyan aprelin 27-də baş nazir Nikol Paşinyanın təqdimatını əsas götürərək Robert Xaçatryanı yüksək texnologiyalar sənayesi naziri təyin edib. Robert Xaçatryan nazir müavini postu tuturdu.
Yüksək texnologiyalar sənayesi naziri vəzifəsi ötən aydan boş idi. 2021-ci ildən nazir olmuş Vaahn Xaçaturyan 2022-ci il martın 3-də prezident seçilib, martın 13-də and içərək səlahiyyətlərinin icrasına başlayıb.
Novator.az bildirir ki, baş nazir Nikol Paşinyanın iki müavini var: Mger Qriqoryan və Ambarsum Matevosyan.
Ararat Mirzoyan xarici işlər naziri, Suren Papikyan müdafiə naziri, Karen Andreasyan ədliyyə naziri, Armen Pambuxçyan fövqəladə hallar naziri, Vaan Kerobyan iqtisadiyyat naziri, Tiqran Xaçatryan maliyyə naziri, Qnel Sanosyan ərazi idarəçiliyi və infrastruktur naziri, Narek Mkrtçyan əmək və sosial məsələlər naziri, Anait Avanesyan səhiyyə naziri, Vaqram Dumanyan elm, təhsil, mədəniyyət və idman naziri, Akop Simidyan ətraf mühit naziridir.
Hökumətdə bu qurumlar birbaşa baş nazirə tabedir: Dövlət Nəzarəti Xidməti, Milli Təhlükəsizlik Xidməti, Ermənistan Polisi.
Nazirlər Kabinetinin nəzdində bu komitələr yer alır: Dövlət Gəlirləri Komitəsi, Şəhərsalma Komitəsi, Statistika Komitəsi, Kadastr Komitəsi, Nüvə Təhlükəsizliyi Komitəsi.
Hökumətə tabe olan müfəttişliklər bunlardır: Şəhərsalma, Texniki Təhlükəsizlik və Yanğın Təhlükəsizliyi Müfəttişliyi, Təhsil Müfəttişliyi, Təbiəti və Yerin Təkini Mühafizə Müfəttişliyi, Səhiyyə və Əmək Müfəttişliyi, Bazara Nəzarət Müfəttişliyi, Ərzaq Təhlükəsizliyi Müfəttişliyi.
Ermənistanda hökumətin strukturu qanunla müəyyən olunur, baş naziri və Nazirlər Kabinetinin başqa üzvlərini prezident təyin edir.
