Gəncə Şəhər Məhkəməsi yaradıldı
Prezident İlham Əliyev Gəncə Şəhər Məhkəməsinin təşkilinə sərəncam verib. Aprelin 25-də imzalanan sənəd şəhərin Kəpəz Rayon və Nizami Rayon məhkəmələrinin ləğvini nəzərdə tutur.
Məhkəmə-Hüquq Şurasına Gəncə Şəhər Məhkəməsinin hakimlərinin ştat sayını müəyyən etmək və hakimlərin təyin edilməsi ilə bağlı təkliflərini 2022-ci il iyunun 1-dək təqdim etmək tövsiyə olunub.
Nazirlər Kabineti Gəncə Şəhər Məhkəməsinin bina, avadanlıq, rabitə, nəqliyyat və digər təşkilati-texniki vasitələrlə təmin edilməsi ilə bağlı tədbirlər görməlidir.
Aprelin 2-də Gəncə şəhərinin inzibati ərazi bölgüsündə dəyişiklik qanunu qüvvəyə minib. Qanuna görə, Gəncə şəhərinin tərkibindəki Kəpəz və Nizami rayonları ləğv edilib.
