Əfv anonsu verildi
Mayın 28-də qeyd olunacaq Müstəqillik Günü ərəfəsində əfv sərəncamı imzalana bilər. Novator.az-ın əldə etdiyi məlumata görə, Əfv Məsələləri Komissiyası müraciətlərin müzakirəsinə start verir. İlk iclas aprelin 26-na təyin olunub.
Əfv Məsələləri Komissiyasına Prezident Administrasiyasının rəhbəri Samir Nuriyev sədrlik edir, katib vəzifəsini Prezident Administrasiyasının hüquq mühafizə orqanları ilə iş şöbəsinin əfv məsələləri sektorunun müdiri Kəmalə İsmayılova tutur. Üzvlər bu şəxslərdir:
Fuad Ələsgərov – prezidentin köməkçisi, administrasiyanın hüquq mühafizə orqanları ilə iş şöbəsinin müdiri
Gündüz Kərimov – Prezident Administrasiyasının qanunvericilik və hüquq siyasəti şöbəsinin müdiri, birinci vitse-prezidentin köməkçisi
Fikrət Məmmədov – ədliyyə naziri
Vilayət Eyvazov – daxili işlər naziri
Əli Nağıyev – Dövlət Təhlükəsizliyi Xidmətinin rəisi
Allahşükür Paşazadə – şeyxülislam, Qafqaz Müsəlmanları İdarəsinin sədri
Əhliman Əmiraslanov – Milli Məclisin deputatı, səhiyyə komitəsinin sədri
Zahid Oruc – Milli Məclisin deputatı, insan hüquqları komitəsinin sədri
Fazil Mustafa – Milli Məclisin deputatı, mədəniyyət komitəsi sədrinin müavini
Azay Quliyev – Milli Məclisin deputatı
Sədaqət Vəliyeva – Milli Məclisin deputatı
Aynur Sofiyeva – Ailə, Qadın və Uşaq Problemləri üzrə Dövlət Komitəsi sədrinin müavini
Rəşad Məcid – Azərbaycan Yazıçılar Birliyinin katibi, Azərbaycan Mətbuat Şurasının İdarə Heyətinin üzvü
Əliməmməd Nuriyev – “Konstitusiya” Araşdırmalar Fondunun rəhbəri
Bəyimxanım Verdiyeva – “Xan Şuşinski” Fondunun rəhbəri
Mehriban Vəliyeva – Akademik Zərifə Əliyeva adına Liseyin direktoru.
Qurumun iclaslarında Ali Məhkəmənin sədri, baş prokuror və dəvət olunan digər şəxslər iştirak edə bilərlər.
Rəsmi əsasnaməyə görə, əfvetmə fərdi qaydada müəyyən edilən şəxslər barədə tətbiq olunur, qərar prezident sərəncamı ilə rəsmiləşir, Azərbaycan məhkəmələrinin məhkum etdiyi və ya başqa dövlətlərin məhkəmələrində məhkum olunaraq cəzalarını Azərbaycanda çəkən şəxsləri əhatə edir. Məhkumun cəzasının qalan hissəsindən azad edilməsi; cəza müddətinin azaldılması; cəzanın çəkilməmiş hissəsinin daha yüngül cəza növü ilə əvəz edilməsi mümkündür. Həmçinin ömürlük azadlıqdan məhkum olunmuş şəxsin cəzası 25 ildən çox olmayan müddətə azadlıqdan məhrumetmə cəzası ilə əvəzlənə, habelə cəzanı çəkmiş şəxsin məhkumluğu götürülə bilər.
Əfvetmə barədə məsələlər Əfv Məsələləri Komissiyasının iclasında baxıldıqdan sonra qəti qərar qəbul edilməsi üçün prezidentə təqdim olunur.
