Makron üstün gəlir
Fransada 2022-ci ilin prezident seçkisi bitib. Novator.az bildirir ki, aprelin 24-də keçirilmiş ikinci turun nəticələrinə görə, dövlət başçısı Emmanuel Makron 58,2 faiz səslə qalib gəlir.
Müxalif namizəd Marin Le Pen 41,8 faiz səslə göstərilir.
Emmanuel Makron 1977-ci il dekabrın 21-də doğulub. Paris Siyasi Tədqiqatlar İnstitutunu və Milli Administrasiya Məktəbini bitirib. Bank sektorunda çalışıb, Fransa prezidenti yanında baş katibin müavini olub. 2014-2016-cı illərdə iqtisadiyyat, sənaye və rəqəmli texnologiyalar naziri postunu tutub.
Əvvəllər Sosialist Partiyasının üzvü olmuş Emmanuel Makron 2016-cı ildə “İrəli, respublika!” hərəkatını yaradıb, 2017-ci il mayın 7-də prezident seçilib, mayın 14-də səlahiyyətlərinin icrasına başlayıb.
Emmanuel Makron Fransanın 8-ci prezidentidir. 1959-1969-cu illərdə dövlət başçısı postunu Şarl de Qoll, 1969-1974-cü illərdə Jorj Pompidu, 1974-1981-ci illərdə Valeri Jiskar d’Esten, 1981-1995-ci illərdə Fransua Mitteran, 1995-2007-ci illərdə Jak Şirak, 2007-2012-ci illərdə Nikola Sarkozi, 2012-2017-ci illərdə Fransua Oland tutub.
Fransa: seçim ikinci tura qaldı
