Oğurluq pulun Britaniya sədası
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu ingilis jurnalist, publisist Oliver Bullounun yeni kitabından yazıb. Novator.az-ın məlumatına görə, o qeyd edir ki, Oliver Bullounun “Butler to the World” (“Dünyanın idarəçisi”) kitabında Böyük Britaniyanın ofşor iqtisadiyyatındakı rolundan bəhs olunur: “Müəllif Azərbaycana da yer verərək yazır ki, Britaniya parlamentinin üzvləri çirkli pulların yuyulmasının Azərbaycana ümumi daxili məhsulun 15 faizinə başa gəldiyini bilirdilər, amma hökumət bunun bir daha baş verməməsi üçün heç nə etməməyi seçdi, bu seçimin də əsas səbəbi London şəhərinin rəqabət qabiliyyətini qorumaq idi.
Yəni Oliver Bullou iddia edir ki, britaniyalılar çirkli pulların yuyulmasında iştirak etməsələr də, ona göz yumublar, bunda maraqlı olublar, bir sözlə, prosesə şərikdirlər.
Burada diqqət çəkən məqamlardan biri Azərbaycanda çirkli pulların dövriyyəsinin həcmidir. Onun ümumi daxili məhsulun 15 faizi qədər olması hazırkı səviyyədə 6,7 milyard dollar, 2014-cü il səviyyəsində 11,2 milyard dollar deməkdir. Yəni son illər 6,7-11,2 milyard dollar vəsait Azərbaycandan oğurlanaraq Britaniyaya, xüsusilə də sərfəli vergi sistemi bölgələrinə – ofşor zonalara daşınıb”.
