Hakimlərə cəza hesabatı
Aprelin 22-si Məhkəmə-Hüquq Şurasının növbəti iclası barədə məlumat yayılıb. Xəbərə görə, iclasda qeyd olunub ki, şuranın fəaliyyəti dövründə hakimlər barədə 300-dən çox intizam icraatı başlanıb, 200-dək hakim məhkəmə sistemindən kənarlaşdırılıb, 43 hakim intizam məsuliyyətinə cəlb edilib, 9 nəfərin səlahiyyətlərinə vaxtından əvvəl xitam verilib, 13 nəfər tutduğu vəzifədən azad olunub.
Hesabata əsasən, son üç ildə 70-dək intizam icraatı başlanıb, 60 hakim məhkəmə sistemindən kənarlaşdırılıb: “Ötən il 220-dən çox hakimin fəaliyyəti qiymətləndirilib, 5 nəfərin səlahiyyətlərinə xitam verilib, 14 nəfərin təkrar qiymətləndirilmələri qərara alınıb. Vətəndaş narazılığı doğuran pozuntulara yol verən 130-dan çox hakim rəsmi xəbərdar edilib, təkrar belə pozuntulara görə intizam icraatları başlanıb.
İclasda 4 nəfərin işində dönüş yaratmadıqlarına görə səlahiyyətlərinə vaxtından əvvəl xitam verilməsi qərara alınıb, apellyasiya məhkəmələrinin 4, Bakı Ağır Cinayətlər Məhkəməsinin 3 hakimi intizam məsuliyyətinə cəlb olunub, birinci və apellyasiya instansiyası məhkəmələrinin 12 hakimi barədə intizam icraatı başlanıb”.
2005-ci ildə fəaliyyətə başlayan Məhkəmə-Hüquq Şurasının hakim vəzifələrinə seçkinin təşkili, hakimlərin fəaliyyətini qiymətləndirmək, onları intizam məsuliyyətinə cəlb etmək, hakimlərin iş yerinin dəyişdirilməsi, vəzifədə irəli çəkilməsi təqdimatları vermək səlahiyyətləri var. Şuraya ədliyyə naziri Fikrət Məmmədov sədrlik edir.
