Rüsum: yenilik qərarları dərc olunub
2022-ci il yanvarın 1-dən “Dövlət rüsumu haqqında” qanunda bir çox yenilik qüvvədədir. Aprelin 21-də Nazirlər Kabineti bir sıra hüquqi aktlarda bununla bağlı uyğunlaşdırma qərarlarını dərc edib. Rəsmi təqdimata əsasən, “Dövlət rüsumu haqqında” qanunda nəzərdə tutulan xidmətlərə və hüquqi hərəkətlərə görə ödənən dövlət rüsumu müəyyən edilmiş hissələrdə həmin xidmətləri və hüquqi hərəkətləri həyata keçirən orqanların və publik hüquqi şəxslərin xəzinə hesabına deyil, tam məbləğdə dövlət büdcəsinə köçürüləcək.
Dərman vasitələrinin yenidən dövlət qeydiyyatı və onların qeydiyyat sənədlərində dəyişikliklərin edilməsi ilə bağlı dövlət rüsumu müəyyən edilib.
Düzgün tutulmamış və ya artıq ödənmiş dövlət rüsumunun geri qaytarılma müddəti 45 gündən 20 günə endirilib.
Mülkiyyət hüquqlarının qeydiyyatı çərçivəsində vərəsəlik nəticəsində əldə edilmiş hüquqların qeydiyyatının da nəzərə alınması dəqiqləşdirilib.
Notariat hərəkətlərinə görə dövlət rüsumunun dövlət büdcəsinə köçürülməsi müddəti 2 bank günündən 1 bank gününə endirilib.
