Laçından yan keçən yol
Azərbaycan Avtomobil Yolları Dövlət Agentliyi Yuxarı Qarabağ bölgəsindən Ermənistana gedən yeni yolun salınması ilə bağlı açıqlama yayıb. Xəbərə görə, Laçın şəhərindən yan keçəcək 2 hərəkət zolaqlı yeni avtomobil yolunun uzunluğu 32 kilometr, hərəkət hissəsinin eni 7 metr nəzərdə tutulur: “Hazırda torpaq yatağının tikintisi, süni qurğuların inşası, yararsız qruntun, həmçinin torpaq yatağının genişləndirilməsi üçün bitki qatının qazılaraq çıxarılması işləri görülür, yolun genişləndirilərək profilə salınması və yeni torpaq yatağının inşası həyata keçirilir.
Yol boyunca suların ötürülməsini təmin etmək məqsədilə dairəvi borular və müxtəlif süni qurğuların tikintisi icra olunur. Bu çərçivədə yolun 22-ci kilometrliyində inşa edilən, uzunluğu 139,5 metr olan 4 aşırımlı körpüdə tikinti işləri son mərhələdədir. Tikinti işlərinin bu il yekunlaşdırılması planlaşdırılır”.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib. 2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-da əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Novator.az bildirir ki, hazırda Laçın şəhəri və rayonun 6 kəndi – Qarıkaha, Ağanus, Fətəlipəyə, Kəravuz, Sus, Zabux kəndləri Yuxarı Qarabağdan Ermənistana gediş-gəlişə ayrılan 5 kilometr enində zolağa düşür. Həmin zolağa Rusiya hərbçiləri nəzarət edir.
Xankəndi şəhəri, Şuşa rayonunun 1 qəsəbəsi, 36 kəndi, Xocavənd şəhəri, rayonun 1 qəsəbəsi, 45 kəndi, Xocalı şəhəri, rayonun 1 qəsəbəsi, 43 kəndi, Ağdərə şəhəri və keçmiş Ağdərə rayonunun 35 kəndi işğal zonasında qalır.
