Avropa Məhkəməsindən qərar anonsu
Aprelin 28-də Avropa İnsan Hüquqları Məhkəməsi Azərbaycandan göndərilmiş şikayət üzrə qərar elan edəcək. Aihmaz.org xəbər verir ki, şikayətçi Bəhruz Həsənov AXCP sədrinin mühafizəçisi olub. 2012-ci ildə küçədə tanımadığı bir şəxs Bəhruz Həsənova yaxınlaşaraq onu ailəsini təhqir etməkdə ittiham edib, mübahisə düşüb. Yaxınlıqdakı mülki geyimli polis əməkdaşları onları Suraxanı Rayon Polis İdarəsinə aparıb.
Bəhruz Həsənov polisdə vəkilsiz dindirilib, öz seçdiyi vəkillə təmin olunması tələbi qoyub, amma istəyi təmin edilməyib. Ərizəçi polis işçisinin qanuni tələbinə qəsdən tabe olmamaqda təqsirli bilinib, Suraxanı Rayon Məhkəməsi ona 10 sutka inzibati həbs cəzası kəsib.
Bəhruz Həsənov Avropa Məhkəməsinə şikayətində Avropa İnsan Hüquqları Konvensiyası ilə tanınan bir çox hüququnun pozulduğunu iddia edib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
