Sərmayə incəlikləri
Dövlət Statistika Komitəsinin hesabatına görə, 2022-ci ilin yanvar-mart aylarında Azərbaycanda iqtisadi və sosial sahələrə 2 milyard 440,7 milyon manat yönəldilib, sərmayənin 62,5 faizi məhsul istehsalı sahələrinin, 30,4 faizi xidmət sahələrinin, 7,1 faizi yaşayış evlərinin tikintisinin payına düşüb.
Statistikaya əsasən, investisiyanın 37,5 faizini dövlət, 62,5 faizini qeyri-dövlət sektorunun sərmayədarları qoyub, daxili mənbələrdən yönəldilmiş vəsaitin dəyəri ümumi sərmayənin 68,7 faizinə bərabər olub.
Sərmayədə müəssisə və təşkilatların vəsaitləri 1 milyard 508,9 milyon manat, büdcə vəsaitləri 599,7 milyon manat, bank kreditləri 42 milyon manat, əhalinin şəxsi vəsaitləri 198,6 milyon manat, sair vəsaitlər 91,5 milyon manat göstərilir.
Qeyd edilir ki, xarici ölkələr və beynəlxalq təşkilatların vəsaitləri hesabına əsas kapitala yönəldilmiş vəsaitin 97,8 faizi Böyük Britaniya, ABŞ, Yaponiya, İsveçrə, Türkiyə, Norveç, Malayziya, Hindistan, Rusiya və İran sərmayədarlarına məxsus olub.
