Rusiyanın xam neft ixracı bir həftədə 25 faiz azalıb
Ukraynaya hərbi təcavüzünə görə sanksiyalarla üzləşmiş Rusiyanın xam neft ixracı bir həftədə 25% azalıb. Xəbəri ABŞ-ın “Bloomberg” agentiyi yayıb.
Agentlik bildirir ki, Ukraynada başlatdığı müharibənin yeddinci həftəsində, aprelin 8-dən 15-nə qədərki dövrdə Rusiya yalnız 3,12 milyon barrel xam neft tədarük edə bilib. Bu isə əvvəlki həftə ilə müqayisədə 25% azdır.
Novator.az qeyd edir ki, “Bloomberg” xəbəri yayarkən neft daşıyan gəmilərin izlənməsi üzrə bilgilərə və liman agenti hesabatlarına əsaslanıb. Agentlik aprelin 8-dən 15-dək olan müddətdə Rusiyanın bütün dörd ixrac terminalından ümumilikdə 21,8 milyon barrelə yaxın xam neftin 30 tankerə yükləndiyini öyrənib.
Həmin həftədəki neft tədarükünün Rusiyaya 181 milyon dollaradək gəlir gətirəcəyi bildirilir və bunun əvvəlki həftə ilə müqayisədə 60 milyon dollar az olduğu vurğulanır.
“Bloomberg” xəbərdarlıq edir ki, gəmilərin transponderləri söndürülsə, hesabat aparmaq çətinləşə və göstəricilər dəyişə bilər.
Bugünlərdə Rusiya prezidenti Vladimir Putin enerji daşıyıcılarının ixracı üçün alternativ bazarlar tapacağına söz verib. Əsas səbəb odur ki, Rusiya neftindən asılı olan Avropa İttifaqında Kremlə qarşı total embarqo tətbiq olunmasına dair çağırışlar güclənməkdədir.
Mənbə: Themoscowtimes.com
