REAL gənclərinin lideri
Respublikaçı Alternativ (REAL) Partiyası Gənclər Birliyinin 17 aprel konfransında 8 nəfərdən ibarət yeni İdarə Heyəti seçilib. İdarə Heyətinin 19 aprel iclasında qurumun sədri müəyyənləşib: Fariz Zöhrabov.
Novator.az-a verilən məlumata görə, Fariz Zöhrabov 1 fevral 1999-cu ildə Qusar rayonunun Düztahir kəndində doğulub. Azərbaycan Turizm və Menecment Universitetinin sosial menecment fakültəsini bitirib. 2017-ci ildən REAL Partiyasının üzvüdür.
REAL Partiyası 2018-ci ildə, 2008-ci ildən fəaliyyət göstərən Respublikaçı Alternativ Hərəkatının bazasında yaradılıb, 2020-ci ildə dövlət qeydiyyatına alınıb. Parlamentdə 1 mandatla təmsil olunan quruma İlqar Məmmədov sədrlik edir. Partiyanın Siyasi Komitəsində sədrlə yanaşı Natiq Cəfərli, Erkin Qədirli, Rəsul Cəfərov, Zaur Qurbanlı və Mahmud Mahmudov yer alır.
1970-ci il təvəllüdlü İlqar Məmmədov tarixçidir, onun siyasi elmlər üzrə magistr dərəcəsi də var.
Milli İstiqlal Partiyası sədrinin müavini olub.
2013-cü il fevralın 4-də hökumət əleyhinə iğtişaşlar təşkil etmək ittihamı ilə tutulub, 2018-ci il avqustun 13-dək həbsdə yatıb.
Ali Məhkəmənin Plenumu 2020-ci il aprelin 23-də İlqar Məmmədova bəraət verib.
