Kino Agentliyi yaradıldı
Aprelin 20-də fərman imzalayan prezident İlham Əliyev Mədəniyyət Nazirliyinin tabeliyində Kino Agentliyi yaradıb. Sənədə görə, publik hüquqi şəxs statuslu agentlik Azərbaycanda kinematoqrafiyanın inkişafının, o cümlədən yerli və müştərək kino istehsalının dəstəklənməsi, kino mədəniyyətinin təbliğinin təşkili, kinematoqrafiya müəssisələrinin və kino sənayesi iştirakçılarının fəaliyyətinin, eləcə də kinematoqrafiya sahəsində yeni informasiya-kommunikasiya texnologiyalarının və innovasiyaların tətbiqinin stimullaşdırılması, Azərbaycan kinematoqrafiyasının dünya kinematoqrafiyasına inteqrasiyası sahələrində fəaliyyət göstərir, nazirliyin tabeliyindəki kinematoqrafiya müəssisələrini idarə edir və onların fəaliyyətinə nəzarəti həyata keçirir.
Qurumun fəaliyyətinə ümumi rəhbərliyi və nəzarəti həyata keçirmək üçün sədr və onun iki müavini daxil olmaqla Müşahidə Şurası yaradılır, cari rəhbərlik baş direktora həvalə olunur.
Nazirlər Kabineti iki ay müddətində agentliyin nizamnaməsinin layihəsini və nizamnamə fondunun miqdarı barədə təkliflərini prezidentə təqdim etməlidir.
