Yarımçıq açıqlama
Əmək və Əhalinin Sosial Müdafiəsi Nazirliyi aprelin 18-də hesabat yayaraq son 3 ildə median əməkhaqqının 80 faiz artdığını bəyan edib, ancaq konkret rəqəm açıqlamayıb.
Median əməkhaqqı muzdlu işçilərin sayının bölünmə nöqtəsinə düşən məbləği əks etdirir. Azərbaycanda median əməkhaqqı məbləği indiyəcən yalnız bir dəfə – 2021-ci il fevralın 16-da bəyan olunub. Novator.az bildirir ki, Əmək və Əhalinin Sosial Müdafiəsi Nazirliyinin həmin hesabatına görə, 2021-ci ilin əvvəlinə muzdla çalışanların yarısı 343 manatdan çox, yarısı həmin məbləğdən az əməkhaqqı alıb.
Dövlət Statistika Komitəsi 2022-ci il martın 1-nə muzdlu işçilərin sayını 1 milyon 682,1 min nəfər, onların orta aylıq nominal əməkhaqqını 768,3 manat göstərib.
Ölkədə minimum aylıq əməkhaqqı 300 manatdır.
