Savaş Rusiya və Ukrayna ilə ticarətə təsir edibmi?
Rusiyanın Ukraynada apardığı işğalçı müharibə Azərbaycanın bu iki ölkə ilə ticarət əlaqələrinə təsir edibmi? Bu günə olan rəsmi rəqəmlər “yox” deyir.
Novator.az Dövlət Gömrük Komitəsinə istinadla bildirir ki, 2021-ci ilin yanvar-mart aylarında Azərbaycanın Rusiya ilə ticarət dövriyyəsi 585 milyon dolları ötmüş, bunun 135 milyon dollardan çoxu ixrac, 450 milyon dollara yaxını idxal kimi rəsmiləşmişdi.
Eyni dövrdə Ukrayna ilə ticarət dövriyyəsi 222 milyon dolları üstələmiş, 122 milyon dollardan çox ixrac, 100 milyon dollara yaxın idxal qeydə alınmışdı.
2022-ci ilin yanvar-mart aylarının Rusiya ilə ticarət dövriyyəsi 631,3 milyon dollardır: 155 milyon dollardan çox ixrac, 476 milyon dollardan çox idxal.
Eyni dövrdə Ukrayna ilə ticarət dövriyyəsi 402 milyon dollardan çox göstərilib, bunun 317 milyon dollarından çoxu ixracın, 85 milyon dollarından çoxu idxalın payına düşüb.
2014-cü ildə Rusiya Ukraynanın Krım yarımadasını tam, Donbas bölgəsini qismən işğal edib. 2022-ci il fevralın 21-də Rusiyanın Ukraynaya yeni təcavüzü başlayıb, fevralın 24-dən isə ölkədə total hərbi əməliyyatlar aparılır, şərq və cənub bölgələrinin bir hissəsi nəzarətə götürülüb.
