İxrac statistikasından sual doğdu
Dövlət Gömrük Komitəsinin hesabatına görə, yanvarda Azərbaycandan 3 milyard 86,6 milyon dollar, fevralda 2 milyard 880,9 milyon dollar, martda 2 milyard 13,3 milyon dollar dəyərində ixrac rəsmiləşib.
Novator.az bildirir ki, bu rəsmi rəqəmlər iqtisadçı, Respublikaçı Alternativ Partiyasının funksioneri Natiq Cəfərlidə sual yaradıb: “Ölkədən ixracın 90,8 faizi xam neft, neft məhsulları və təbii qazdır. Brent markalı neftin orta qiyməti yanvar ayında 91,21 dollar, fevralda 100,99 dollar, martda 107,91 dollar göstərilib. Yəni mart ayında orta qiymət yanvar ayına nisbətən 16,7 dollar yuxarı olub. Rübün son ayında ölkənin qaz ixracatı da artıb.
Bəs neftin qiyməti yüksək olubsa, qaz ixracatı da artıbsa, hökumət qeyri-neft ixracında da ciddi artım olduğunu söyləyirsə, necə ola bilər ki, mart ayında ixrac yanvar ayına nisbətən 1 milyard dollardan çox azalıb, səbəblər nədir?”
Azərbaycanın 2022-ci i büdcəsində bir barrel neftin qiyməti 50 dollardan götürülüb. “AzəriLayt” markalı Azərbaycan nefti yanvara 82,49, fevrala 94,20, marta 102,30, aprelə 112,33 dollarla başlayıb.
