Gözlənən itki
London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu Dövlət Neft Fondunun rüblük hesabatına diqqət çəkib.
Novator.az bildirir ki, rəsmi açıqlamaya görə, 2022-ci ilin yanvar-mart aylarında fondun büdcə gəlirləri 2 milyard 955,9 milyon manat, xərcləri 2 milyard 764,5 milyon manat olub, aprelin 1-nə aktivləri 45 milyard 264 milyon ABŞ dollarına çatıb.
Qubad İbadoğlu yanvar-mart aylarında Neft Fondunun 1 milyard 660,8 milyon manat itkiyə məruz qaldığını vurğulayır: “Bu itki əsasən fondun Rusiya bazarında yerləşdirdiyi və xəbərdarlıqlara baxmayaraq geri çəkmədiyi aktivlərin dəyərsizləşməsindən yaranıb. Dolların bahalaşmasına görə valyuta məzənnələrinin dəyişməsindən yaranan büdcədənkənar gəlir 214,3 milyon manat göstərilir. Qurumun aktivlərinin 70 faizi ABŞ dollarındadır.
Aprelin 1-nə fondun aktivləri 2022-ci ilin əvvəli ilə müqayisədə 0,5 faiz artıb. Nəzərə alaq ki, Neft Fondunun 2022-ci il büdcəsi xam neftin barreli üçün 50 dollar əsasında hesablanıb, ancaq ilin ilk rübündə Azərbaycan neftinin barreli orta hesabla105 dollara satılıb”.
Martın ilk günlərində Qubad İbadoğlu Dövlət Neft Fondunun aktivlərinin 0,6 faizinin Rusiya rublunda saxlandığını, bu valyutanın isə ölkəyə tətbiq edilən sanksiyalar üzündən ucuzlaşdığını vurğulamış, həmçinin Rusiyanın VTB Bankındakı 500 milyon dollarlıq sərmayənin ciddi dəyər itirdiyini qeyd etmişdi.
