Dünya azərbaycanlıları beşinci qurultaya toplaşır
Aprelin 22-23-ü Şuşa şəhərində dünya azərbaycanlılarının beşinci qurultayı keçiriləcək. Qurultaya prezident İlham Əliyevin də qatılması gözlənir.
Novator.az bildirir ki, dünya azərbaycanlılarının birinci qurultayı 2001-ci il noyabrın 9-10-da, ikinci qurultayı 2006-cı il martın 16-da, üçüncü qurultayı 2011-ci il iyulun 5-6-da, dördüncü qurultayı 2016-cı il iyunun 3-də keçirilib. Həmin qurultaylara paytaxt Bakı ev sahibliyi edib.
Əsası 1750-ci ildə qoyulan Şuşa Qarabağ xanlığının paytaxtı, Qarabağ əyalətinin, Şuşa qəzasının baş şəhəri, Yuxarı Qarabağda rayon mərkəzi olub. 1992-ci il mayın 8-nə keçən gecə Şuşaya hücum edən erməni birləşmələri mayın 9-da şəhəri ələ keçirib. 2020-ci il noyabrın 8-də Azərbaycan hərbçiləri Şuşanı düşməndən təmizləyib. 2021-ci il mayın 7-də Şuşa Azərbaycanın mədəniyyət paytaxtı elan edilib.
