Çinin ruspərəst təbliğatı ifşa olunur
“Tvitter” sosial şəbəkəsinin istifadəçiləri Rusiya-Ukrayna müharibəsi haqda Çində aparılan saxta təbliğatı ifşa etməyə başlayıblar.
Novator.az bildirir ki, kimliyini anonim saxlayan istifadəçilər bir neçə həftədir Çinin ən populyar saytlarında, sosial şəbəkələrində dərc olunan, Rusiyanın hakim dairələrinin təbliğatı ilə üst-üstə düşən mətnləri tərcümə edərək “Tvitter”də yerləşdirirlər.
Onlar bununla Çin hakimiyyətinin ölkədə Rusiyanın xeyrinə saxta təşviqat aparmaqda maraqlı olduğunu sübuta yetirirlər.
“Tvitter”də başlanan bu kampaniyadan Pekinin narahatlıq keçirdiyi qeyd olunur. Çünki tərcümə edilmiş mətnlər Qərb auditoriyasına Çin hakimiyyətinin Ukrayna həqiqətlərini necə ört-basdır etməyə çalışdığını göstərir.
Tərcümələr arasında məşhur çinli bloqçunun Ukraynanın Kramatorsk şəhərindəki dəmiryolu vağzalına raket zərbəsini Rusiyanın yox, Ukraynanın endirdiyi barədə yazdıqlarını, tanınmış jurnalistin Ukraynanın Buça şəhərindəki kütləvi qırğının inkarına yönəlmiş şərhini oxumaq, başqa saxta iddialara, yüz minlərlə izləyicisi olan bloqçuların, media təmsilçilərinin yalanlarına şahidlik etmək mümkündür.
2014-cü ildə Ukraynanın Krım yarımadasını tam, Donbas bölgəsini qismən işğal edən Rusiya 2022-ci il fevralın 21-də bu ölkəyə qarşı yeni təcavüzə başlayıb, fevralın 24-dən isə orada total hərbi əməliyyatlar aparır. Ölkənin hərbi və mülki obyektlərinə, o cümlədən yaşayış evlərinə, xəstəxanalara, qadınların, uşaqların sığındığı binalara zərbələr endirilir, təxliyə olunmaq istəyən dinc sakinlər atəşə tutulur, şəhərlər bombalanır.
Mart ayında rus qoşunları Ukrayna xalqının və ordusunun müqaviməti qarşısında bəzi məntəqələrdən, o cümlədən paytaxt Kiyev ətrafından geri çəkiləndən sonra azad edilmiş yaşayış yerlərində, xüsusilə Buça şəhərində dinc ukraynalıların kütləvi surətdə qətlə yetirildiyi bəlli olub, kütləvi məzarlıqlar aşkar edilib.
Mənbə: CNN.com
